Greqi, kapen 3 shqiptarë të bandës së mashtrimit e përvetësimit të parave

nga **Durrsaku** prej Fri Dec 16, 2011 7:30 pm

ATHINE - Policia e Athinës shkatërroi një organizatë kriminale, anëtarë të së cilës ishin shtetas grekë dhe shqiptarë, e cila akuzohet për falsifikim, përvetësim dhe pastrim të parave.

Kjo organizatë vepronte në Greqi, që nga viti 2006.

Policia vuri në pranga 3 shtetas shqiptarë dy burra të moshës 40 dhe 44 vjeç dhe një grua e moshës 28 vjeç, ndërkohë që është vënë në kërkim të 11 personave të tjerë.

Nga hetimet u konstatua se grupi kishte prodhuar karta fallco identiteti të qytetarëve grekë që i pajisnin me foto të anëtarëve të grupit dhe me to paraqiteshin në degët e bankave, kompanitë tregtare të makinave, zyrat e telefonisë mobile, zyrat e strehimit etj, për blerje dhe kontrata të ndryshme.

Automjetet e blera në këtë mënyrë shkonin përmes Bullgarisë dhe Shkupit, në tregun shqiptar ku shiteshin dhe pajiseshin me targa të rregullta.

Dëmi i përgjithshëm i shkaktuar nga aktivitetet e paligjshme të organizatës kriminale kalon 450 000 euro.